Zeitspiegel

[dmünchnerin]

Sie hod koan Anfang, hod koa End,
is ned zum greifa mit de Händ.
Ma sigt s ned, konn s ned hern,
ned fanga und eisperrn.

Sie laßt se ausfuin und vabringa,
rinnt oam manchmoi zwischn d Finger.
Sie laßt se nemma, laßt se steihn,
sie konn oam z lang wern oder fein.

Ma konn s valiern, doch nia mehr findn:
sie lafft noch vorn, niamois noch hintn.
Sie konn braucht wern oder dränga,
ma konn s nutzen und vaschenga.

Ma konn s messen, ned beschreibn.
Ma konn se s lassn und vatreibn.
Sie hoid oan ei, rennt oam davo,
hod ma zvui ghabt und vado.

Jahrzehnte kenna goidn sei.
Und lodt oam jemand lächlnd ei:
"Kumm an mei grüne Seiten",
dann winka rosige Zeiten.

Grau is olle Theorie,
aa de Maus vo vis-à-vis.
Und olle Katzn in der Nacht
ham de Farb zua eahnan gmacht.

Ma moanat, bei der Farbpalettn,
daß olle gnua zur Auswahl hättn.
Doch seng, bedauerlicherweis,
de meisten nur in schwarz und weiß.